ՀՊՏՀ «Ամբերդ» հետազոտական կենտրոնի «Մրցակցություն ու կարգավորում» ուղղությամբ սեմինար

ՀՊՏՀ «Ամբերդ»  հետազոտական կենտրոնում այսօր հերթական գիտական սեմինարն էր՝ «Կարգավորում և մրցակցություն» ուղղության շրջանակներում՝ տ.գ.դ., պրոֆեսոր Միքայել Մելքումյանի ղեկավարությամբ: Սեմինարին մասնակցում էին գիտության և արտաքին կապերի գծով պրոռեկտոր Գագիկ Վարդանյանը, հետազոտական կենտրոնի տնօրեն Սամվել Ավետիսյանը՝ իր աշխատակազմով, դասախոսներ, ասպիրանտներ:
Բանախոս Միքայել Մելքումյանը նախ ներկայացրեց ամբիոնային հետազոտության հիմնախնդիրները

(ՀՀ մրցակցային հարաբերությունների կարգավորում, ընտրված ոլորտներում հարկային հարաբերությունների կատարելագործում և այլն), այնուհետև
անդրադարձավ ակնկալվող արդյունքներին՝  օրենսդրական դաշտի, մրցակցային դաշտի կատարելագործում, երկրի մրցունակության բարձրացում, արտահանման ծավալների ավելացում, միջազգային չափանիշներին համապատասխան որակյալ արտադրանքի թողարկում, տարածքային համաչափ զարգացում:

 Հետազոտողների խմբի անդամները (հիմնականում ասպիրանտներ) հանդես եկան ելույթներով:

Տ.գ.թ. Արթուր Առաքելյանը ներկայացրեց ապահովագրությունը Հայաստանում տարիներով, թվերով (դրամով), հավաքագրված ապահովագրավճարները և այլն, իր ուսումնասիրությունների վերաբերյալ ներկայացրեց եզրակացություններ և առաջարկներ,  ասպիրանտ Սուրեն Պարսյանը հանդես եկավ «Գերիշխող դիրքի չարաշահման իրավական կարգավորման հիմնախնդիրները ՀՀ-ում» թեմայով՝ անդրադառնալով «Տնտեսական մրցակցության պաշտպանության մասին» ՀՀ օրենքին,   առաջարկեց դրանում կատարել մի քանի փոփոխություններ և լրացումներ:

Հաջորդիվ ելույթ ունեցավ դասախոս Մարգարիտա Ավետիսյանը՝ անդրադառնալով հանքագործական արդյունաբերությանը, այնուհետև ասպիրանտ Վարդան Մարությանը ներկայացրեց հարկային հարաբերությունների կարգավորման և քաղաքացիական ավիացիայի ոլորտների մասին իր կատարած  ուսումնասիրություները: Հետազոտական խմբի ներկայացուցիչներն առաջարկություններ և եզրակացություններ ներկայացրին:

Տ.գ.դ.,պրոֆեսոր Սերգեյ Մելքումյանն անդրադարձավ ՀՀ արդյունաբերության, մասնավորապես լեռնահանքաարդյունաբերության թեմային՝ մատնանշելով ոլորտում առկա հիմնախնդիրները՝ կապված հումքի մշակման հետ: Պրոֆեսորն առաջարկեց համապատասխան միջոցառումներ ձեռնարկել, որը հնարավորություն կտա հումքն օգտագործել առավելագույն կերպով՝ արտանետելով միայն դրա չնչին մասը:

Սեմինարի ավարտին  պրոռեկտոր Գագիկ Վարդանյանը հայտնեց իր գոհունակությունը՝ նշելով, որ խումբն իրականացրել է մեծածավալ աշխատանք: Անդրադառնալով իրականացվող հետազոտություններին՝ պրոռեկտորն ընգծեց առաջարկությունների դերը և նշեց, որ դրանք պետք է այնքան արժեքավոր լինեն, որ կառավարության կողմից պահանջարկ ունենան:

Գիտական սեմինարը եզրափակեց «Ամբերդ» կենտրոնի տնօրեն Սամվել Ավետիսյանը՝ նշելով, որ կենտրոնում  լուրջ հետազոտություններ են իրականացվում, լավ գաղափարներ են հնչում, որոնք պետք է ներկայացվեն հանրությանը: Այս ուղղությամբ, նրա խոսքով, կենտրոնի ղեկավարությունը նախատեսում է որոշակի քայլեր նախաձեռնել:

Աղբյուրը՝ ՀՊՏՀ Լրատվության և հասարակայնության հետ կապերի բաժին