Լեհաստանը վերանայել է պարտադիր կուտակային վճարների դրույքաչափը

1999թ. կենսաթոշակային բարեփոխումների արդյունքում Լեհաստանում ներդրվեց 3 սյուների վրա հիմնված կենսաթոշակային համակարգ.

1-ին սյունը պետական սոցիալական ապահովագրությունն էր, որի համար աշխատողները իրենց աշխատավարձի 12.22%-ն էին վճարում:

2-րդ սյունը անհատական պարտադիր կուտակային համակարգն էր, որի համար
աշխատողները իրենց աշխատավարձի 7.3%-ն էին վճարում:

3-րդ սյունը անհատական կամավոր
կուտակային համակարգն էր, որի համար յուրաքանչյուր աշխատող իր հայեցողությամբ վճարումներ է անում:

Պարտադիր կուտակային համակարգը տարածվում էր 1968 թ. դեկտեմբերի 31-ից հետո ծնվածների վրա: Նվազագույն աշխատավարձից պահումներ չի արվում: Պահումներ չի արվում նաև միջին աշխատավարձի 30-ապատիկից ավել աշխատավարձից: Միջին աշխատավարձը 2012թ. կազմել է 3416 զլոտի կամ 1093 ԱՄՆ դոլար:

2008-2009 թվականների ֆինանսատնտեսական ճգնաժամը մեծ դժվարությունների առջև կանգնեցրեց Լեհաստանի կառավարությանը. բյուջեի դիֆիցիտը աճում էր, հետևաբար աճում էր նաև պետական պարտքը: 2011թ. հրատապ կերպով Լեհաստանի կառավարությունը կենսաթոշակային համակարգում մի շարք կտրուկ փոփոխություններ իրականացրեց, մասնավորապես՝ տղամարդկանց դեպքում՝ 65 տարեկան, կանանց դեպքում՝ 60 տարեկան, կենսաթոշակային տարիքը բարձրացվեց երկու սեռի դեպքում էլ 67-ի: Հաջորդ փոփոխությամբ պարտադիր կուտակային վճարները նվազեցրեց 5%-ով` փոխարենը ավելացնելով պետական սոցիալական ապահովագրության համակարգին ուղղվող վճարումները, արդյունքում՝ 1-ին սյան վճարումները դարձան 17.22%, իսկ 2-րդ սյանը՝ 2.3% (պարտադիր կուտակային): Նախատեսվում է պարտադիր կուտակային վճարները մինչև 2017թ. բարձրացնել 3.5%-ի: Այսպիսով՝ Լեհաստանը ևս մասնակիորեն վերանայեց պարտադիր կուտակային համակարգը:

Տեղեկատվության աղբյուրը՝ 

Միջազգային սոցիալական ապահովության ասոցիացիայի <<Սոցիալական ապահովության ծրագրերը ողջ աշխարհում>> հետազոտական աշխատանք