Էստոնիայի կուտակային կենսաթոշակային համակարգը

Էստոնիայում կենսաթոշակային համակարգը հիմնված է 3 սյունների վրա, դրանք են՝

1. Պետական թոշակ,
2. Կուտակային թոշակ (պարտադիր),
3. Լրացուցիչ կուտակային թոշակ (կամավոր):

Պետական կենսաթոշակը իր հերթին բաղկացած է՝ հիմնական մասից (բազային թոշակ), աշխատած տարիների մասից և վճարած սոցիալական ապահովագրության հարկերի մեծությամբ պայմանավորված մասից:

Մինչև պարտադիր կուտակային համակարգի ներդրումը 1998 թվականից Էստոնիայում գործել է կամավոր կուտակային համակարգը, ինչը թույլ է տվել համակարգի արդյունավետությունը և թերությունները ստուգել պրակտիկայից ելնելով:

2002 թվականի մայիս 1-ից Էստոնիայում սկսել է գործել պարտադիր կուտակային կենսաթոշակային համակարգը, որը տարածվում է 1982 թվականի դեկտեմբերի 31-ից հետո ծնվածների համար, այսինքն՝ 18 տարեկան լրացած այն անձանց վրա, ովքեր նոր էին աշխատաշուկա մտնում:

01.05.2002-31.10.2010  ժամանակահատվածում պարտադիր կուտակային համակարգին կամավոր կարող էին միանալ այն անձինք, ովքեր ծնվել են 1942-1982 թվականների ընթացքում:

Գործատուն յուրաքանչյուր աշխատողի հաշվով ամսեկան աշխատավարձի 20%-ի չափով սոցիալական հարկ է վճարում:

Պարտադիր կուտակային համակարգը, երկրի սոցիալ-տնտեսական իրավիճակով պայմանավորված, փոփոխության է ենթարկվել, մասնավորապես

• 01.05.2002-31.05.2009 թվականների ընթացքում՝ աշխատողը իր բրուտո-աշխատավարձի 2%-ն է կուտակել, գործատուի վճարած սոցիալական հարկի հաշվին պետությունը իր հերթին ավելացրել է 4%,
• 01.06.2009-31.10.2010 թվականների ընթացքում պետությունը կուտակման համար բյուջեից հատկացում չի արել, պարտադիր կուտակային վճարումները ամբողջությամբ ուղղվեցին սերունդների համերաշխության կենսաթոշակային համակարգին (պետական թոշակին),
• 01.01.2011-31.12.2012 թվականների ընթացքում՝ աշխատողը իր բրուտո-աշխատավարձի 1%-ն է կուտակել, գործատուի վճարած սոցիալական հարկի հաշվին պետությունը իր հերթին ավելացրել է 2%,
• 2013թվականի հունվարի 1-ից սկսած վերադարձ է եղել պարտադիր կուտակայինի վճարների սկզբնական տարբերակին, այսինքն՝ աշխատողը իր բրուտո-աշխատավարձի 2%-ն է կուտակել, գործատուի վճարած սոցիալական հարկի հաշվին պետությունը իր հերթին ավելացրել է 4%:

2013 թվականից սկսած պետությունը յուրաքանչյուր երեխայի հաշվով 1 % կուտակում է անում խնամող ծնողի համար:

Տեղեկատվության աղբյուրը՝ PENSIONIKESKUS tule PENSIONILE